McLarenliðið frumsýndi keppnisbíl sinn í dag og er hann verulega frábrugðin að hönnun en bíll síðasta árs. Liðsstjórinn Martin Whitmars segir markmiðið klár; að vinna bæði titil bílsmiða og ökuþóra í ár.

Mest áberandi breyting frá í fyrra er að nú er á bíl McLaren svonefndur hákarlsuggi sem nemur nánast við afturvænginn. Slíkan ugga var ekki að finna á bílnum í fyrra en mörg lið voru með slíka útfærslu á sínum bílum.

McLaren heldur sig við sömu litaskipan og útfærslu sem undanfarin ár þrátt fyrir minnkandi aðild mótorsmiðsins Mercedes sem leggur nú megin áherslu á eigið lið og eigin „silfurörvar“.

Liðið er í þeirri óvenjulegu stöðu að vera með heimsmeistara tveggja síðustu ára sem ökuþóra. Árangur liðsins í fyrra var undir væntingum og nú þarf það til viðbótar að kljást við Mercedesliðið. Eigendur þess, þýski bílsmiðurinn Mercedes-Benz, á enn hlut í McLaren, sem ætlunin er þó að losa sig við.

Whitmarsh sagði við athöfnina í dag, að góður undirbúningur væri lykill að árangir. „Við höfum undirbúið okkur betur og ítarlegar undir tímabilið í ár en nokkru sinni,“ sagði hann.

„Frábært lið og samkeppnisfær bíll skilar þó því aðeins árangri, að það hafi bestu ökumennina. Hvorugan keppanda okkar þarf að kynna því sín á milli hafa þeir unnið heimsmeistaratitlana tvö undanfarin ár. Það er frábært að geta teflt fram Lewis [Hamilton] og Jenson [Button]. Báðir eru sigurvegarar og báðir vilja vinna í ár. Markmið okkar er klár; það er að sigra,“ sagði Whitmarsh.

Það kemur í hlut reynsluökuþórsins Gary Paffett að frumaka bílnum. Það mun eiga sér stað í Valencia á Spáni á mánudag.