Ferrari neyðist til að fresta frumakstri 2010-bílsins
2010-bíll Ferrari. reuters
Ferrari verður að bíða með frumakstur 2010-bílsins, sem frumsýndur var í gær, þar sem óhagstætt veðurfar kemur í veg fyrir akstur í Fiorano-brautinni á Ítalíu annan daginn í röð.
Til stóð að Felipe Massa frumæki F-10 bílnum í Fiorano í gær eftir frumsýningu bílsins +i Maranello í gærmorgun. Af því gat þó ekki orðið vegna ísingar og launhálku víða í brautinni af völdum kuldakasts.
Hið sama var uppi á teningnum í dag, veðrið kom aftur í veg fyrir að óhætt væri að hleypa bílnum út í brautina.
Því var ekki um annað að ræða en aflýsa frekari tilraunum til frumaksturs á heimavelli og bíða með hann þar til í Valencia á Spáni á mánudag. Þar hefst fyrsta lota bílprófana formúluliðanna í ár.
Keppnisbíll Ferrari sviptur hulum í Maranello í gær.
