Ferraribíllinn hæggengur?

Alonso og Massa við frumsýningu Ferraribílsins sem óttast er að sé ekki nógsamlega hraðskreiður. HO

Breska blaðið The Times segir að Ferrari sé þegar að vinna að annarri uppfærslu keppnisbíls ársins, svonefndri B-útgáfu hans, því bíllinn sem það hefur frumsýnt sé ekki nógu hraðskreiður.

Times vitnar til sögusagna í ítölskum fjölmiðlum í þessa veru þar sem fjallað sé um útreikninga á afkastagetu bílsins eftir prófanir í vindgöngum.

Þar segi að forsvarsmenn Ferrari óttist að bíllinn muni ekki reynast eins góður og væntingar hafi staðið til. Og það þrátt fyrir að þróun bílsins í fyrra hafi verið hætt á miðri vertíð svo tæknisveitin gæti einbeitt sér að 2010-bílnum.

Þá segir fyrrverandi Ferrariþórinn Gerhard Berger við svissneska blaðið Blick, að jafnvel þótt Ferrari hafi fengið Fernando Alonso til liðs við sig sé „Ferraripakkinn“ ekki eins öflugur nú og í tíð Michaels Schumacher.

Hann segir liðið nú sakna sárt þeirra Jean Todt, Ross Brawn og hönnuðarins Rory Byrne. „Án rétta mannskapsins lenda menn fljótt í ógöngum,“ segir Berger.