Button og Hamilton eru heimsmeistarar áranna 2008 og 2009. mbl.is/mclarenf1

Lewis Hamilton hefur skýrt frá því, að hann hafi róið að því öllum árum að McLarenliðið réði Jenson Button til sín. Hefði hann legið í liðsstjóranum  Martin Whitmarsh og það talsvert áður en liðið byrjaði að ræða við Button.

Hamilton segist hafa lesið alls kyns sögur um að hinir og þessir ökumenn væru ef til vill á leið til McLaren. Því hefði hann sett sig í samband við Whitmarsh og spurt hvað væri á seyði. 

„Hvað með Jenson?“ segist hafa spurt Whitmarsh en Brawnþórinn var þá ekki meðal þeirra sem orðaður var við McLaren. „Hvers vegna hann, var svarað. Vegna þess að hann er sá besti og þeir vildu fá besta ökumanninn,“ segir Hamilton.

„Ég hef ekkert með ökumannamálin að gera en var statt og stöðugt spurður hver yrði liðsfélagi minn. Því kannaði ég málið og sagði mínar skoðanir,“ bætir hann við.

Hamilton segir það ekki hafa verið honum kappsmál að sjá Heikki Kovalainen hverfa á braut frá McLaren, en hafi skynjað að liðsforystan hafi viljað breytingar.