Kubica og Petrov við Renaultinn á frumsýningunni í Valencia. reuters

Renaultliðið frumsýndi keppnisbíl komandi  vertíðar síðdegis í gær í Valencia á Spáni. Við það tækifæri var staðfest ráðning rússneska ökumannsins Vitaly Petrov sem keppnismanns við hlið Roberts Kubica hins pólska.

Því er um að ræða algjöra uppstokkun á skipan ökuþóra frá í fyrra hjá Renault. Petrov er 25 ára og varð í fyrra í öðru sæti í stigakeppni ökumanna í GP2-formúlunni.

Hann er og með þessu fyrsti rússneski ökuþórinn til að keppa í formúlu-1.

Þótt gulur litur sé fyrirferðamestur er útlitið talsvert frábrugðið frá í fyrra og svartur litur gefur bílnum sterkan svip. Minnir útlitið um margt á bíl Renault frá upphafsári þátttöku franska liðsins í formúlu-1, árið 1978. Hornir eru litir fyrrverandi aðalstyrktarfyrirtækis liðsins, ING, appelsínugult og hvítt.

Í rauninni er að hefjast nýtt skeið í sögu þátttöku Renault því nýir eigendur eru komnir að liðinu í samstarfi við franska bílafyrirtækið. Starfsemin hefur verið stokkuð upp og nýr liðsstjóri er Eric Boullier.

Við frumsýninguna sagði Bouiller að þótt eigi væri auðvelt að setja sér markmið og ekki á vísan að róa, gerðu liðsmenn sér háleitar vonir um árangur í ár. Markmiðið væri að koma liðinu í toppslaginn á ný eftir slakt gengi í fyrra.

Bouiller sagði ennfremur, að tekin hefði verið viss áhætta í hönnun og þróun R30-bílsins. Ætti bíllinn að verða samkeppnisfær, að hans sögn. Á bílnum er að finna samskonar hákarlsugga ofan á vélarhúsinu og er á bílum sem McLaren og Sauber hafa frumsýnt. Slíkur uggi var á bílum Renault í fyrra en ekki hinna liðanna tveggja.