Massa aftur fljótastur
Kobayashi lét að sér kveða í dag í Valencia. reuters
Felipe Massa hjá Ferrari ók hraðast annan daginn í röð við bílprófanir í Valencia á Spáni í dag, en þar eru sjö formúlulið við reynsluakstur nýrra keppnisbíla sinna.
Massa náði besta hringnum á fyrstu klukkustund æfinganna í morgun en eftir það einbeitti hann sér að löngum aksturslotum. Einnig setti Kamui Kobayashi hjá Sauber sinn besta hring á fyrsta tímanum og reyndist það annar besti tími dagsins.
Eftir því sem leið á daginn bötnuðu tímar annarra ökumanna jafnt og þétt. Lewis Hamilton hjá McLaren mætti til starfa hjá McLaren í dag og setti þriðja besta tímann. Ók hann einnig í löngum lotum og hið sama gerði Robert Kubica hjá Renault sem var tveimur brotum á eftir Hamilton að tíma.
Kubica setti sinn besta tíma á síðasta hálftímanum en Hamilton um miðjan dag.
Nico Rosberg var einn um akstur Mercedes í dag en Michael Schumacher tekur við af honum á morgun. Rubens Barrichello hélt áfram akstri fyrir Williams annan daginn í röð.
Talsverður fjöldi áhorfenda var í stúkum Valenciabrautarinnar í dag og gær að fylgjast með æfingunum. Töldust þeir vera 7.200 í gær en á morgun er búist við að þeir margfaldist því þá ekur Fernando Alonso fyrir Ferrari. Tveir aðrir meistarar verða þá einnig í brautinni, Jenson Button og Schumacher.Niðurstaða æfingarinnar í dag varð annars sem hér segir:
| Röð | Ökuþór | Bíll | Tími | Hri. |
| 1. | Massa | Ferrari | 1:11.722 | 124 |
| 2. | Kobayashi | BMW Sauber | 1:12.056 | 96 |
| 3. | Hamilton | McLaren | 1:12.256 | 108 |
| 4. | Kubica | Renault | 1:12.426 | 119 |
| 5. | Rosberg | Mercedes | 1:12.899 | 119 |
| 6. | Barrichello | Williams | 1:13.377 | 102 |
| 7. | Buemi | Toro Rosso | 1:13.823 | 107 |
Hamilton í Valencia í dag. reuters
Alonso mætti til Valencia í dag. reuters
