Rosberg leggur af stað. reuters

Nico Rosberg hjá Mercedes setti besta tímann er formúluliðin hófu aðra bílprófanalotu ársins í Jerez á Spáni í dag. Rigning háði liðunum öllum. Reyndar setti Rosberg besta tímann á fyrstu klukkstundinni, eða áður en hann tók að rigna að ráði.

Þrátt fyrir að hafa sett besta tímann endaði dagurinn illa fyrir Rosberg því bíll hans bilaði í miðri braut er skammt var eftir æfingatímans.  Hann var þó ánægður og sagðist hafa fundið sig mun betur í Mercedesbílnum en í Valencia í síðustu viku.

Næsthraðast ók Sebastien Buemi hjá Toro Rosso og munaði aðeins tíunda úr sekúndu á tímum þeirra. Allir hinir ökuþórarnir settu sína bestu tíma einnig á fyrstu klukkustundinni. 

Mark Webber frumók keppnisbíll Red Bull og lítt er að marka tíma hans því hann var enn að gangprófa kerfi bílsins og ekki byrjaður að botnkeyra er byrjaði að rigna.

Webber varð að hætta akstri úti í miðri braut eftir 47 hringi rétt fyrir hádegi vegna olíuleka. Viðgerð tók sinn tíma því hann komst ekki aftur af stað fyrr en er aðeins voru 15 mínútur eftir af deginum.

Williamsliðið sagðist ánægt með hvernig Cosworthmótorinn hafi reynst en  Nico Hulkenberg ók samtals 118 hringi. Hann var einna fljótastur í rigningunni en setti þriðja besta tíma dagsins í byrjun dags. 

Fernando Alonso ók öðru sinni fyrir Ferrari en ók lítið sem ekkert fyrir hádegi. Ætlun liðsins var að spara bílinn þar til upp stytti eftir hádegi en vonir þess um að hann stytti upp rættust ekki. Notaði Alonso því tímann eftir hádegi til að aka í löngum lotum. Sagðist hann sáttur því gagnaöflun hefði gengið vel og það myndi nýtast til að gera bílinn endingartraustari.

Alonso sagði bílinn hafa verið mjög meðfærilegan í bleytunni og hann væri þægilegur og auðveldur viðureignar.

Margir ökuþórar spöruðu bílana vegna aðstæðna og kusu liðin að bíða frekar betra veðurs til morguns.

Keppnisbíl Virgin mætti sömuleiðis til sinnar fyrstu æfingar. Skortur á varahlutum olli því þó að Timo Glock gat ekki ekið fyrr en eftir hádegi. Eftir kerfisprófanir ók hann eina þriggja hringja lotu en hætti svo.

Æfingin gekk annars fyrir sig sem hér segir: