Button ánægður með bílinn
Button á leið til þriðja besta tíma í Jerez. reuters
Jenson Button var hæstánægður að lokinni tveggja daga æfingalotu á silfurör McLaren í Jerez á Spáni, en Lewis Hamilton tekur við reynsluakstri bílsins á morgun.
Button segist hafa náð að aðlagast bílnum vel og sér líði vel í honum. Ók hann alls 82 hringi í dag og setti þriðja besta tíma dagsins. Var Button reyndar með næstbesta tímann þar til á lokasekúndum æfingarinnar.
Annað var uppi á teningnum í Valencia í síðustu viku og í Jerez í gær. Passaði hann ekki sem skyldi í bílsætið. Ástæðan mun sú, að Button er sjö sentimetrum stærri en Lewis Hamilton og því einfaldlega verið of stór í bílinn eins og hann var upp settur.
Fyrir bragðið skagaði hann of hátt upp úr stjórnklefanum og legan í bílnum hentaði honum ekki. Á þessu réðu tæknimenn McLaren bót í gær og nú er Button hæstánægður.
„Þetta var fínn dagur og ég finn mig frábærlega í bílnum. Það vel að nú gat ég unnið í uppsetningum, jafnvæginu og ýmsum öðrum þáttum bílsins. Að grunni til er bíllinn góður en mikil vinna framundan við að bæta hann. Út á það gengur reynsluaksturinn,“ sagði Button.
Button kveðst ánægður í silfurör McLaren. reuters
