Dennis og Lewis Hamilton á góðri stundu. ap

Ron Dennis, helsti eigandi McLarenliðsins, hefur verið tekinn inn í svonefnda „frægðarhöll“ akstursíþrótta sem tímaritið Motorsport hefur stofnað og hleypt var af stokkum við hátíðarathöfn í London sl. þriðjudag.

McLarenstjórinn fyrrverandi var tekinn inn í höllina við það tækifæri ásamt þremur fyrrverandi ökuþórum,  Tony Brookes, Jacky Ickx og Mario Andretti, sem varð heimsmeistari ökumanna árið 1978.

Dennis hefur starfað á vettvangi formúlunnar frá árinu 1966, en sama ár kom McLaren fram á sjónarsviðið. Hans fyrsta lið var þó Cooper.

„Það er lítt þekkt staðreynd að frá þessum tíma hafa á annað hundrað lið komið til leiks og horfið úr formúlu-1. Af liðunum sem voru í keppni árið 1966 lifa aðeins tvö í dag, Ferrari og McLaren.

Við getum borið höfuðið hátt, af 665 mótum sem við höfum tekið þátt í höfum við unnið 164, eða um fjórðung. Á verðlaunapalli höfum við verið í 352 mótanna, eða í rúmlega öðru hverjum kappakstri,“ sagði Dennis um hvað markverðast væri af ferlinum.

Á árlegri verðlaunahátíð breska akstursíþróttaritsins Autosport í desember sl. var Dennis veitt sérstök heiðursviðurkenning blaðsins fyrir langan og farsælan feril á vettvangi formúlunnar.

Við stofnun frægðarhallarinnar voru átta ökumenn gerðir að stofnmeðlum hennar. Þar er um að ræða frægustu nöfn formúlu-1; Tazio Nuvolari, Enzo Ferrari, Juan Manuel Fangio,  Stirling Moss, Jim Clark, Jackie Stewart, Ayrton Senna og Michael Schumacher.

Fjórmenningarnir sem fyrst eru nefndir voru síðan teknir inn í þennan frægðarhóp. Af stofnmeðlimunum voru viðstaddir Stirling Moss og Jackie Stewart.