Schumacher milli aksturslota í Jerez í dag. reuters

Kamui Kobayashi hjá Sauber setti besta tímann við reynsluakstur formúluliða í Jerez á Spáni í dag. Hrifsaði hann toppsæti tímalistans á síðasta hring. 

Aðstæður voru mun betri í dag en í gær en þá var brautin lengst af blaut vegna rigningar. Þar sem þurrt var að mestu í dag voru tímar ökuþóranna miklu mun betri í dag.

Sebastien Buemi hjá Toro Rosso hafði verið hraðskreiðastur lengstan part dagsins, en naut ekki toppsætisins þegar upp var staðið; Kobayashi hafði hreppt það um það leyti sem æfingin var flautuð af.

Jenson Button hjá McLaren átti þriðja besta tímann en gat þó ekki klárað æfinguna þar sem silfurörin gafst upp og stoppaði í miðri braut er um 10 mínútur voru eftir.

Lítið fór fyrir tveimur fyrrverandi heimsmeisturum. Michael Schumacher átti aðeins sjötta besta tímann á Mercedesbílnum og  Fernando Alonso aðeins þann sjöunda besta á Ferrari. Báðir einbeittu sér hins vegar að löngum aksturslotum og því alltaf bensínþungir.

Schumacher tók t.d. eina lotu upp á 35 sleitulausa hringi og Alonso ók í einni bunu 48 hringi án þess að stoppa. Undir lok hennar var hann býsna hraðskreiður, að nálgast bestu brautartíma. Alonso ók manna mest í dag, eða 129 hringi og voru tímar hans í lotunum löngu mun betri en hjá Schumacher.

„Ég er mjög ánægður með daginn þótt við gætum ekki klárað allt sem ætlunin var að gera,“ sagði Schumacher. „Mér tókst þó að aka mikinn fjölda hringja sem var mikilsvert. Mér leið vel og þægilega í bílnum,“ bætti hann við.

Renault ákvað að fela Robert Kubica aksturinn í dag til að ná sem mest út úr góðviðrisdeginum en útlit er fyrir vætu næstu tvo daga. Vitaly Petrov fékk því frí í dag en ekur aftur á morgun.

Timo Glock átti í vandræðum með Virginbílinn. Losnaði framvængurinn af bílnum í miðjum hring og vegna skorts á varavæng ók hann ekki meira þann daginn.

Niðurstaða æfingarinnar varð sem hér segir: