Vettel í Jerez í dag. reuters

Sebastian Vettel hjá Red Bull ók langhraðast við bílprófanir í Jerez á Spáni í dag. Þar hófst þriðja þróunaraksturslotan í ár og gerði skúraveður ökumönnum lífið leitt.

Inn á milli skúranna braust sólin í gegnum skýin og reyndu ökumenn að nýta sér þær stundir sem best. Í einu skúrahléinu rétt eftir hádegi setti Vettel besta tíma dagsins.

Er brautin var að þorna eftir eina skúrina í viðbót á síðustu mínútum æfingarinnar skaust Lewis Hamilton hjá McLaren upp í annað sætið, fram úr Felipe Massa hjá Ferrari. 

Sebastien Buemi hjá Toro Rosso setti fjórða besta tímann, á undan Pedro de la Rosa hjá Sauber og Michael Schumacher hjá Mercedes. Meistarinn fyrrverandi ók manna mest í dag, eða 111 hringi.

Schumacher sagði erfitt að fara eftir áætlun dagsins vegna breytilegs veðurs. Af sömu ástæðu væri erfitt að gera sér góða grein fyrir getu annarra ökumanna.

Æfingin var annars söguleg sakir þess að þetta var fyrsta opinbera æfing Lotusliðsins nýja. Varaökumaðurinn Fairuz Fauzy sá um aksturinn og lagði að baki 76 hringi sem þykir gott hjá nýliðum.

Fauzy var býsna langt frá besta brautartíma en sló þó við Timo Glock hjá Virgin sem gat aðeins ekið 10 hringi.

Niðurstaða æfingarinnar varð annars sem hér segir: