Rosberg á Mercedesbílnum. reuters

Nico Rosberg sagði eftir lokalotu bílprófana fyrir keppnistímabilið, að Mercedesliðið ætti einungis eftir að fínstilla uppsetningar bílsins. Að öðru leyti væri liðið klárt í keppnina um toppsætin frá og með fyrsta móti.

Rosberg ók hraðast við bílprófanir í Barcelona á laugardag og var einkar ánægður með Mercedesbílinn. „Almennt séð er ekki neinn veikleika í honum að finna sem stendur,“ sagði Rosberg.

„Við þurfum einungis að ná betri tökum á uppsetningunni til þess að geta náð út úr honum það sem í bílnum býr. Það er viðfangsefni okkar og miðar því í rétta átt,“ bætti hann við.

Rosberg segist fara með hýrri há til fyrsta mótsins, í Barein eftir tæpan hálfan mánuð. Hann segist kunna vel við sig í stjórnklefa Mercedesbílsins og falli vel inn í liðið.

„Það er erfitt að segja hvar við stöndum en ég er fullur sjálfstrausts í bílnum, það er gott að keyra hann og ég mun sækja fram á honum.“

Rosberg segist mæta bjartsýnn til leiks. reuters

Rosberg segir góða tilfinninguna fylgja því að keyra Mercedesbílinn. reuters