Schumacher á stund milli stríða í lokaprófunum liðanna í Barcelona í síðustu viku. reuters

Michael Schumacher er ekki alltof bjartsýnn á að Mercedesliðið geti keppt til sigurs í fyrstu mótum komandi vertíðar. Hann útilokar það ekki og segir niðurstöðu bílprófana að undanförnu gefa vissar vonir.

Schumacher var svartsýnn á föstudaginn var og efaðist þá um samkeppnisfærni Mercedesliðsins. Daginn eftir var annað uppi á teningnum og sagðist hann þá öllu bjartsýnni en daginn áður. 

Þau sinnaskipti sagði hann stafa af því að hann hefði lagst yfir gögn úr reynsluakstrinum á föstudag og laugardag og sæi málið í nýju ljósi.

„Útlitið er mun betra en mér sýndist, það byggðist á tilfinningum en eftir að hafa rannsakað gögnin er útlitið mun betra en ég hélt. Við vorum ef til vill að keyra mun hlaðnari af eldsneyti á föstudag en aðrir. Því var útlitið ekki gott, en það er í raun ekki svo slæmt,“ segir Schumacher.

Heimsmeistarinn fyrrverandi vill þó ekki vera með mikla spádóma. Spurður hvort liðið myndi fagna sigri svaraði hann: „Kannski, kannski ekki. Það er mikilvægara að sjá hvað á sér stað undir lok vertíðarinnar en í fyrsta móti.

Við verðum að vera skammt frá toppnum. Séum við ekki í stöðu til að keppa til sigurs í fyrsta móti mun ég ekki hafa miklar áhyggjur. Séum við tveimur sekúndum á eftir á hring, þá er hins vegar ástæða til að hafa áhyggjur - en ég held að staðan sé ekki sú."

Og spurður um hver sé sigurstranglegastur í ár sagði Schumacher: „Ég held að Felipe [Massa] og Fernando [Alonso] séu bestir í stöðunni. Þeir hafa verið að gera góða hluti á æfingum. Ég þekki lið og veit því að þeir hafa ástæðu til að gleðjast. Ég er ekkert hissa á því.

Ekki veit ég hvort einhverjir hafa sýnt á öll spilin að undanförnu, jafnvel með þá reynslu sem ég bý yfir á ég erfitt með að átta mig á því. Mörg llið virðast mjög samkeppnisfær.“