Bílhlutinn umdeildi kom í ljós við frumsýningu bílsins í lok janúar sl. mbl.is/mclarenf1

Sjaldnast hefur verið skortur á klögumálum í formúlu-1. Nú er hið fyrsta í ár komið upp. Keppnisliðin Red Bull og Ferrari hafa klagað afturvæng McLarenliðsins til Alþjóða akstursíþróttasambandsins (FIA) og óskað eftir staðfestingu þess á lögmæti hans.

Þetta staðfestir liðsstjóri Red Bull, Christian Horner.  Hann kveðst gera sér vonir um að niðurstaða liggi fyrir áður en fyrsti kappakstur komandi vertíðar fer fram í Barein í næstu viku.

Því er haldið fram, að hönnun kæliturns vélarhúss McLarenbílsins og vélarhlífin, sem samtengd er afturvængnum, stuðli að því að afturvængurinn ofrísi á mikilli ferð en með því næst fram aukinn bílhraði á beinlínuköflum.

Horner segir að í vængnum sé rauf er leiði til þess að ná megi mun meiri hraða úr bílnum á beinum kafla en ella. „Við höfum óskað eftir afstöðu FIA til málsins en ég held þó Ferrari sé mun ákafari í því efni en við,“ sagði Horner við breska blaðamenn í vikunni. Hann telur að með hönnuninni sé McLaren að reyna komast kringum reglur sem tóku á hönnun sem ætlað var að koma í veg fyrir að liðin gætu látið afturvænginn ofrísa, eins og það er kallað, en þá hverfur loftmótstaða hans og fyrir vikið næst mun meiri hraði eftir ofrisið.