Lada merkið á skrokk Renaultins. mbl.is/renaultf1

Fæstum Íslendingum dettur formúla-1 í hug í sömu andrá og Ladabíll birtist þeim. Rússneski bílaframleiðandinn er hins vegar á leið inn í íþróttina, sem styrktaraðili Renaultliðsins.

Bílar Renault verða merktir Lada í bak og fyrir en rússneski bílsmiðurinn verður styrktaraðili franska liðsins í ár og rússneska ökuþórsins Vitaly Petrov, sem ráðinn hefur verið til að keppa fyrir Renault.

Samstarf Renaultliðsins og Lada nýtur sérlegs stuðnings Vladímírs Pútín forsætisráðherra Rússlands. Því er ætlað að vekja athygli á rússneskum íþróttum og það er jafnframt liður í áformum Moskvuborgar um að fá til sín keppni í formúlu-1.

Í ljósi samstarfsins segja gárungarnir nú, að keppnisbíll Renault sé hraðskreiðasta Lada sögunnar. 

Franski bílsmiðurinn, Renault, á 25% hlutafjár í rússneska bílafyrirtækinu AvtoVaz sem framleiðir Löduna.

Merki Lada verður áberandi á bílum Renault. mbl.is/renaultf1