Massa í Barcelona í síðustu viku. reuters

Sést hefur til Felipe Massa að undanförnu með gleraugu á nefinu. Því vakna spurningar hvort hann þurfi - í framhaldi af slysinu í Búdapest í fyrrasumar -  að keppa með þau.

Massa segist engar skemmdir hafa orðið á sjóninni við óhappið í Búdapest. Þar hlaut hann alvarleg höfuðmeiðsl er gormur úr öðrum bíl hafnaði af miklu afli á höfuðhjálmi hans. Sjóntruflanir hlaut hann einnig en sjónin kom með tímanum að fullu til baka.

Til Massa hefur þó sést með gleraugu og því var hann spurður hvort hann þyrfti að nota þau við keppni.

„Nei, ég er með smá vott að nærsýni og því nota ég þau við akstur í myrkri og þegar ég horfi á kvikmyndir. Mér finnst betra að sjá vel textann,“ svaraði hann. „Í kappakstri, jafnvel á kvöldin, þarf ég þau ekki,“ bætti hann við.