Afturvængur McLarenbílsins er nokkuð frábrugðinn væng annarra liða, og tenging hans við kæliturninn er umdeild. mbl.is/mclarenf1

McLarenliðið segist ekkert óttast vegna umdeildrar hönnunar á afturvæng en bæði Red Bull og Ferrari hafa óskað eftir áliti og afstöðu Alþjóða akstursíþróttasambandsins (FIA) til vængsins.

McLarenmenn telja sig vera innan ramma tækniregla formúlunnar, en fulltrúar Red Bull og Ferrari eru óánægðir með hvernig lausn McLaren nýtir kæliturn og vélarhlíf bílsins til að eyða loftmótstöðu vængsins á mikilli ferð - og þar með gera bílinn hraðskreiðari á löngum beinum köflum.

Christian Horner liðsstjóri Red Bull sagði í gær, að Ferrari væri eiginlega mun áhugasamara um vængmálið en lið sitt. Fulltrúi McLaren dró það í efa og sagði svo virðast sem Ferrari tækið málið ekki jafn alvarlega og Red Bull.

„Við erum sannfærðir um að okkar bíll er fullkomlega innan regla og höfum ekki orðið varir við nein mótmæli. Staðreyndin er sú, að við höfðum samband við Ferrari í morgun og þeir vita ekki um nein mótmæli heldur,“ sagði talsmaður McLaren í morgun.

Þá hefur vefsetrið autosport.com eftir heimildarmönnum hjá Ferrari að þar á bæ verði ekki aðhafst neitt frekar í málinu og útilokað væri að liðið legði fram formlega kæru.