Hamilton við reynsluakstur 2010-bíls McLaren. reuters

Lewis Hamilton hefur skýrt frá því, að ekki hafi mikið vantað á að hann hætti keppni og léti sig hverfa af vettvangi formúlu-1 eftir hneykslið í ástralska kappakstrinum þar sem hann afvegaleiddi dómara kappakstursins.

Að fyrirmælum liðsstjóra hjá McLaren, Dave Ryan, gaf Hamilton villandi yfirlýsingar hjá dómurunum er þeir rannsökuðu framúrakstur Jarno Trulli hjá Toyota meðan öryggisbíll var í brautinni.   

Er upp komst um málið var Trulli sýknaður af broti sem hann var dæmdur í en McLaren og Hamilton refsað, með þriggja móta skilorðsbundnu keppnisbanni. Þá leiddi málið til þess að Dave Ryan var rekinn frá liðinu en þar hafði hann starfað um langt árabil.

Hamilton sætti harðri gagnrýni vegna hneykslisins og varð það til þess að hann íhugaði að hætta keppni í formúlu-1. „Það gekk mjög mikið á. Mér er ekki sama hvað fólk heldur um mig og mér fannst eins og ég ætti jafnvel ekki heima í íþróttinni lengur. Þetta var ekki spurningin um að yfirgefa McLaren, heldur fara úr íþróttinni.

McLaren er draumalið mitt og hér hef ég verið frá upphafi ferilsins. Mig hefur aldrei langað að keppa fyrir annað lið. Því snerist hugsunin ekki um að yfirgefa liðið, heldur snúa alveg baki við keppni. Mér fannst ágjöfin of mikil og spurði mig hvernig ég gæti siglt út úr brotsjónum.“

Hamilton segist þakka það sýndum stuðningi og hvatningu í framhaldinu að hann lét slag standa og hvikaði hvergi. „Ég fékk stuðning úr fjölskyldunni, frá liðinu, stuðningsmönnum, ótrúleg stuðningsbréf bárust. Ég sá að ég fengi annað tækifæri eftir þessi mistök, með öllum þessum stuðningi,“ segir Hamilton.

Lewis Hamilton var skapi næst að hætta keppni. reuters