Bruno Senna (með húfu) og Karun Chandhok keppa fyrir Hispania í ár.

Jafnvel þótt splunkunýjum keppnisbíl Hispanialiðsins hafi ekki verið ekið er ökuþórinn Bruno Senna á því að hann sé hraðskreiðari en bílar hinna nýju liðanna tveggja, Lotus og Virgin.

Senna sver sig í ættina en móðurbróðir hans, Ayrton Senna, hafði sínar skoðanir á mönnum og málefnum og lá ekki á þeim. 

Reyndar byggir Senna þessa skoðun sína á upplýsingum frá bílsmiðnum Dallara hinum ítalska, sem m.a. framleiðir bíla fyrir GP2-mótaröðina. Hann hefur mikla reynslu af smíði alls kyns keppnisbíla og dregur ályktun af útkomu á mælingum í vindgöngum og reiknilíkönum.

„Við æfingar í Barcelona voru Lotus og Virgin aðeins um sekúndu fljótari með hringinn en GP2-bílar en um þá hefur Dallara öll gögn. Og samkvæmt útreikningum þeirra ættum við frá fyrsta degi að vera tveimur sekúndum fljótari en GP2-bílar,“ segir Senna í dálki sem hann skrifar fyrir vikuritið Motorsport Magazin.

Hann bætir því við að það fari þó eftir því hvort Dallarabíllinn reynist stöðugur strax frá byrjun. „Ég vona við verðum á undan þeim,“ segir Senna.

Bruno Senna. reuters

Bruno Senna er bjartsýnn á gengi Hispanialiðsins.