Adrian Sutil leggur af stað í aksturslotu við bílprófanir nýverið. mbl.is/forceindaf1

Vijay Mallya, eigandi og liðsstjóri Force India, kveðst vongóður um að liði hans takist að vinna stig að staðaldri í mótum í ár. Það er markmið þess, en liðið lauk liðnu keppnistímabili nokkuð öflugt og vonar Mallya að byrjunin í ár verði í sama dúr.

„Við lukum keppnistímabilinu 2009 kröftuglega - unnum okkar fyrstu stig, komumst á verðlaunapall, færðumst upp um sæti í keppni liðanna,“ segir Mallya í aðdraganda fyrsta móts ársins, í Barein komandi sunnudag. 

„Það eitt í sjálfu sér dugar til þess að við setjum markið hærra í ár og við erum ákveðnir í að komast stigi ofar. Stig að staðaldri og stöku sæti á verðlaunapalli  hlýtur að vera takmarkmið í ár. Ég hef tröllatrú á ökumönnunum og tækniliði okkar, það smellur allt mjög saman hjá okkur,“ bætir hann við.

Mallya segir að góður árangur við reynsluakstur að undanförnu gefi mannskap sínum góðar vonir. Ökuþórinn Tonio Liuzzi er á því að Force India eigi að geta unnið stig strax í fyrsta mótinu.

„Við viljum sýna í fyrsta móti að vetrarstarf okkar hefur borið ávöxt. Takmarkið er að vinna stig og að komast í hóp 10 bestu, eins ofarlega og hægt er,“ segir Liuzzi.

Liuzzi ætlar að vinna stig í Barein. mbl.is/forceindiaf1