Glock milli aksturslota við bílprófanir í Barcelona í lok febrúar. reuters

Þýski ökuþórinn Timo Glock segir sér hafa staðið til boða að keppa fyrir bæði Renault og Sauber í ár. Hann hafi hins vegar talið atvinnuöryggi meira hjá nýja Virginliðinu og því tekið það fram yfir hin tvö.

Er Toyota ákvað að draga sig út úr formúlunni þótti liggja í loftinu að Glock færi til Renault og gerðist liðsfélagi Roberts Kubica. En Sauber var einnig valkostur, að sögn blaðsins Frankfurter Rundschau.

„Íþróttalega séð hefðu þessi lið verið mjög góður valkostur,“ játar Glock í samtali við blaðið. „En við Sauber blasti löng bið eftir því hvort liðið fengi að vera með í formúlu-1.

Renault var ofarlega á óskalistanum en síðan kom tímabil vegna yfirtöku á liðinu. Ég hugsaði sem svo og sagði við sjálfan mig, að ef hlutirnir gengju upp hjá hvorugu liðinu stæði ég uppi atvinnulaus. Það geðjast mér ekki, ég er fyrir nýjungar og spennandi hluti,“ bætir Glock við.

Hann réð sig því til Virginliðsins sem er eitt nýju liðanna sem mætir til leiks í formúlu-1 í ár.

Virginbíllinn hefur staðið öðrum bílum talsvert að baki við bílprófanir.

Virginbíllinn við reynsluakstur í Barcelona. mbl.is/virginf1