Fernando Alonso stefnir að sigri í fyrsta móti sem ökumaður Ferrari.

Fernando Alonso hjá Ferrari sagði blaðamönnum í Barein í dag að hann vildi ekki ráða of mikið úr niðurstöðum bílprófana í vetur og fyllast sjálfstrausti af góðri frammistöðu Ferrarifáksins við þær.

Á grundvelli reynsluaksturs undanfarnar vikur þykir staða Ferrari ætla verða sterk í keppninni um heimsmeistaratitil ökuþóra og bílsmiða. Og þótt hann hafi nýlega lýst Ferraribílnum sem besta kappakstursbílnum sem hann hefði nokkru sinni ekið  segist hann ekki geta spáð neinu um hvernig hann stæði gagnvart keppinautunum.

„Við gerum ekki mikinn samanburð á tímunum frá í vetur eða byggjum ekki áætlanir okkar fyrir fyrsta mót á þeim. Við einbeitum okkur að okkar eigin verkefnum og freistum þess að vera eins góðir og unnt er fyrir fyrsta mót ársins,“ sagði Alonso í Barein í dag.

„Ég held fjögur lið, Red Bull, Mercedes, McLaren og Ferrari geti öll talist sigurstrangleg um helgina og í fyrstu mótum vertíðarinnar. Sauber og Force India eru einnig með góða bíla.

Við munum gera okkar besta, erum vel undir keppnina búnir en viljum verða heimsmeistarar í nóvember, ekki í mars. Markmiðið er að vinna titilinn, það er ekki leikur einn og við þurfum að leggja hart að okkur næstu 10 mánuðina til þess,“ bætti meistarinn fyrrverandi við.

„Ég held ég sé klár til að keppa til sigurs. Ég hef undirbúið mig vel í vetur og vonandi verðum við í aðstöðu til að sigra,“ sagði Alonso.

Ökumenn Ferrari í ár, Massa (t.v.) og Alonso. reuters