Lewis Hamilton reynsluekur 2010 bíl McLaren. mbl.is/mclarenf1

Keppnisbíll McLaren stóðst skoðun eftirlitsmanna Alþjóða akstursíþróttasambandsins (FIA) í Barein í dag. Þar með er afturvængur hans löglegur, en Red Bull og Ferrari höfðu látið í ljós efasemdir um það.

Tæknifulltrúi FIA, Charlie Whiting, rannsakaði og mældi afturvæng McLarenbílsins sérstaklega í morgun og gaf að því loknu grænt ljós á notkun hans. Hafði Whiting fylgst með hönnun og þróun bíls McLaren í vetur og ráðfærði liðið sig nokkrum sinnum við hann um lögmæti hönnunarinnar.

Bæði Red Bull og Ferrari töldu að McLarenliðið notaði sérstaka og ólöglega útfærslu á kæliturni vélarhúss bílsins til að hafa áhrif á loftflæði um vænginn í þeim tilgangi að auka beinlínuhraða hans. Því hefur nú verið hafnað af FIA.