Rosberg (t.h.) með Schumacher í Barein í dag. reuters

Nico Rosberg keppir með Mercedes og hefur Michael Schumacher sem liðsfélaga. Kveðst Williamsþórinn fyrrverandi bjartsýnn á að hann standi uppi í hárinu á meistaranum fyrrverandi.

Rosberg segist hlakka til þess að fá að spreyta sig og sanna gegn Schumacher, sem hefur unnið heimsmeistaratitil ökumanna sjö sinnum. Lauk hann síðustu bílprófanalotu vetrarins, í febrúarlok í Barcelona, með betri tíma en Schumacher.

Hvað sem því líður þá hefur frammistaða Rosberg í vetur alveg fallið í skuggann af endurkomu Schumacher til keppni í formúlu-1 eftir þriggja ára hlé. Hann segir það samt ekkert raska ró sinni.

„Ég geng mjög bjartsýnn til keppni. Mér líður einstaklega vel í bílnum, fullur sjálfstrausts. En baráttan verður engu að síður mjög erfið því ég er með fremur öflugan liðsfélaga. Við verðum að bíða og sjá hvernig það kemur út,“ sagði Rosberg i Barein í dag.

Nico Rosberg í Barein í dag. reuters