Hamilton á ferð í Barein í dag. reuters

Lewis Hamilton hjá McLaren segist eftir æfingarnar í Barein í dag enga hugmynd hafa um hvers megi vænta í tímatökunum á morgun. Á æfingunum náði hann annars vegar sjötta besta tíma og síðar þeim næstbesta.

Hamilton segir liðin enn hafa lítið að byggja á við samanburð sín á milli. „Í hreinskilni sagt hef ég enga hugmynd,“ svaraði hann spurningu hvort hann gæti unnið ráspól á morgun.

„Bíllinn virkar vel en ég veit ekki hvað aðrir voru að gera. Sumir gætu hafa verið léttari, aðrir þyngri. Við gætum verið alvarlega hæggengir eða glettilega hraðskreiðir. Um þetta vitum við ekkert fyrr en út í tímatökurnar er komið,“ bætti heimsmeistarinn frá 2008.

Hamilton gekkst við því að McLaren hefði áhyggjur af dekkjasliti eftir æfingarnar. Brautarhiti hafi verið mikill og kvörnun úr báðum dekkjagerðunum mikil. Hann segist þó ekki búast við nema einu dekkjastoppi í kappakstrinum á sunnudag. En bætir við að til að fara sem best með dekkin en fá samt sem mest út úr þeim þurfi ökuþór nánast að breyta um aksturstækni á hverjum hring.

Gemsinn ónáðar Hamilton í bílskúrareininni í Barein í dag. reuters