Massa: Reyndum ekki við topptíma
Massa í Barein í dag. reuters
Felipe Massa hjá Ferrari var sáttur að æfingum dagsins loknum í Barein. Hann ók hraðar en liðsfélagi hans Fernando Alonso, setti sjöunda besta tímann, var 1,1 sekúndu frá besta tímanum.
Þótt aksturstímar á föstudögum einkennist af óþekktri taktík einstakra liða og dylji bensínhleðslur bílanna sagðist Massa vera ánægður með daginn.
„Við unnum mikið í því að finna gott jafnvægi í bílnum uppstilltum fyrir keppni og bárum saman dekkjagerðirnar tvær við mismunandi bensínáfyllingar. Við botnkeyrðum aldrei, leituðumst aldrei eftir að setja topptíma,“ sagði Massa eftir æfingarnar.
„Ég er ánægður með það sem við höfum séð og upplifað í dag, jafnvel þótt erfitt sé að fá rétta mynd af hversu samkeppnisfærir við erum,“ bætti hann við. „Við munum fá harða keppni frá mörgum liðum en við undirbúum okkur undir sunnudaginn eins vel og frekast er unnt,“ sagði Massa einnig.Kappaksturinn er sá fyrsti sem hann þreytir frá í Ungverjalandi í júlí í fyrrasumar, en þar slasaðist hann alvarlega.
Massa keppir í fyrsta sinn frá í Búdapest júlí í fyrra. reuters
Massa (t.v.) hefur félagsskap og keppni af Alonso í ár. reuters
