Prost dómari í Barein

Prost (t.h.) og Schumacher voru á sínum tíma keppinautar.

Það nýmæli hefur verið tekið upp af hálfu Alþjóða akstursíþróttasambandsins (FIA) til að bæta dómgæslu og eftirlitsstörf á mótum formúlu-1, að á hverjum kappakstri verður fyrrverandi ökuþór kvaddur til leiks sem dómari.

Franski ökuþórinn Alain Prost er sá fyrsti sem kallaður er til aðstoðar við dómgæsluna, í Barein um helgina. Með þessu fyrirkomulagi er ætlunin að auka á gagnsæi og sanngirni í öllum ákvörðunum FIA-dómaranna, að því er segir á breska akstursíþróttavefsetrinu autosport.

Prost vann heimsmeistaratitil ökumanna á sínum tíma fjórum sinnum og tefldi síðar fram eigin keppnisliði í formúlu-1. Hann keppti 199 sinnum á árabilinu 1980 til 1993 með m.a. Williams, McLaren og Ferrari. Þrjá titlana vann hann með McLaren, 1985, 1986 og 1989 og þann fjórða með Williams 1993.

Prost keypti síðan Ligierliðið franska árið 1997 og tefldi því fram undir eigin nafni. Það dó drottni sínum í ársbyrjun 2002 og komst aldrei á rásmarkið það ár, eins og til hafði staðið.

Prost, sem er 55 ára, hefur haldið sér í góðri æfingu. Undanfarin ár hefur hann m.a. keppt með góðum árangri í ískappakstri og er tvöfaldur franskur meistari í þeirri grein.

Fleiri gamlir meistarar dæma

Fyrir liggur að fleiri gamlir meistarar muni dæma á formúlumótum í ár. Damon Hill, meistari ökuþóra 1996, hefur samþykkt að dæma tvisvar og þreytir hann frumraun sína í Mónakó. Annar Englendingur, Johnny Herbert, mun dæma í ótilgreindum mótum síðar á vertíðinni.

Þá munu bæði Heinz-Harald Frentzen og Alexander Wurz hafa samþykkt að gegna dómarastarfi á mótum í ár.