Alonso með Vettel rétt á eftir sér í Barein. reuters

Fernando Alonso hjá Ferrari ók hraðast á lokaæfingunni fyrir tímatökurnar í Barein en æfingunni var að ljúka. Nico Rosberg hjá Mercedes ók næsthraðast og var 0,269 sekúndum lengur með hringinn. Þriðja besta tíma setti Mark Webber á Red Bull.

Michael Schumacher setti fjórða besta tímann og undirstrikar þar með ágæti Mercedesbílsins en varð að sætta sig við það þriðju æfinguna í röð, að Rosberg hafði betur í innbyrðis keppni þeirra.

Sebastian Vettel hjá Red Bull varð fimmti  og Felipe Massa hjá Ferrari sjötti. Með því tylla ökumenn Ferrari, Mercedes og Red Bull sér í sex efstu sætin. Athygli vekur að heimsmeistarinn Jenson Button setti aðeins sjöunda besta tímann og liðsfélagi hans Lewis Hamilton varð einungis í 12. sæti. Gat hann ekki ekið undir lok æfingarinnar vegna bilunar í McLarenbílnum.

Timo Glock hjá Virgin ók hraðast ökumanna nýju liðanna þriggja sem ráku lestina. Indverjinn Karun Chandhok hjá Hispania getur ekki tekið þátt í tímatökunum né kappakstrinum á morgun þar sem ekki tókst að gera bíl hans ökufæran fyrir æfingarnar þrjár.

Niðurstaða æfingarinnar varð annars sem hér segir: