Íþróttir
|
Formúla 1
| mbl
| 13.3.2010
| 13:11
Schumacher nýtur allsnægta
Bónus fyrir stig er ekki hár hjá Sauber, enda nýtur liðið lítilla styrkja. reuters
Þrátt fyrir engan aðalstyrktaraðila hefur Peter Sauber samþykkt að borga föstum starfsmönnum Sauberliðsins lítils háttar kaupauka vegna frammistöðu þess í keppninni um heimsmeistaratitla bílsmiða í ár.
Að sögn svissneska blaðsins Blick er ekki um fúlgur fjár að ræða, heldur 25 svissneska franka á mann fyrir hvert stig sem vinnst, eða á fjórða þúsund krónur fyrir stigið.
Og verður miðað við gamla stigakerfi formúlunnar, ekki hið nýja í ár sem veitir stig fyrir fleiri sæti og mun fleiri en áður fyrir fremstu sætin. Því verður eftirtekjan mun minni en ef miðað væri við nýja stigakerfið.
Blaðið blandar Michael Schumacher hjá Mercedes inn í umfjöllun sína um kjaramál Sauberliðanna og segir þar á ferð önnur fjárráð og meiri. Hafi hann til íveru einkavillu með einkaströnd og einkakokki. Fyrir það þurfi hann að greiða 6.000 evrur á sólarhring, eða sem svarar á aðra milljón krónur nóttina.
Schumacher hefur efni á að lifa flott. reuters
© Árvakur hf.
Öll réttindi áskilin
