Bruno Senna á ferð í Barein. reuters

Það voru ári svefnvana menn sem yfirstigu alla erfiðleika og komu báðum bílum Hispania liðsins af stað í tímatökurnar í Barein.

Þeir höfðu glímt við bilanir í bíl Karun Chandhok sem missti fyrir vikið af æfingunum tveimur í gær og dag. En loks virkaði bíllinn sem skyldi er tímatökurnar hófust og gat hann tekið þátt í þeim - og slapp þannig eiginlega fyrir horn inn í kappaksturinn á morgun.

Svo hart hafa tæknimenn og vélvirkjar Hispania lagt að sér undanfarna daga við að gera bíla Bruno Senna og Chandhok sem besta úr garði, að fæstum þeirra hefur komið dúr á auga í fjóra sólarhringa.

Spænskir fjölmiðlar segja marga liðsmenn ekki hafa komið á hótel sitt í nokkra daga. Meðal vökumanna hafi verið liðsstjórinn Colin Kolles.

Bíll Karun Chandhok komst ekki úr bílskúrnum í æfingarnar þrjár. reuters