Button klár í slaginn í Barein. reuters

Heimsmeistarinn Jenson Button hjá McLaren sagðist ánægður eftir kappaksturinn í Barein þótt hann hæfi titilvörnina með því að ná einungis sjöunda sæti. Hann sagðist þó hafa haldið of mikið aftur af sér til að spara dekkin.

Button er á því að hann hefði getað sótt djarfar fram að dekkjahléinu því dekkin hefðu enst mun betur en áætlað var. Þess vegna hefði allt eins verið hægt að taka stoppið síðar.

Hann sagði það svekkjandi að hafa ekki komist fram úr fyrrverandi meistara, Michael Schumacher hjá Mercedes, eftir að hafa sótt verulega á hann á síðustu hringjunum fyrir dekkjastoppið.

Button vann sig altjent fram úr Mark Webber hjá Red Bull í stoppunum. Liðsfélagi hans Lewis Hamilton vann sig einnig fram úr keppinaut, Nico Rosberg hjá Mercedes, í stoppunum.

Heimsmeistarinn sagði McLarenbílinn hafa skort vængpressu á miðkafla brautarinnar til að hægt væri að leggja til atlögu við Schumacher.

Button á ferð í kappakstrinum í Barein. reuters

Button og Webber háðu stöðubaráttu alla keppnina. reuters