Massa ánægður með endurkomuna
Massa fagnar í Barein. reuters
Jafnvel þótt hann hafi tapað fyrir liðsfélaga sínum í Barein í dag segist Felipe Massa hjá Ferrari ánægður með að hafa sett mark sitt á fyrsta kappaksturinn eftir að hann snýr aftur til keppni í framhaldi af slysinu í Búdapest í fyrra.
Massa varð á undan Ferrarifélaga sínum Fernando Alonso í tímatökunum og hóf keppni af öðrum rásstað. Ræsing hans var ekki eins góð og hjá Alonso sem vann sig fram úr Massa í tveimur fyrstu beygjunum. Hann var því í betri stöðu er bíll Sebastian Vettel feilpústaði og Ferrarimennirnir komust fram úr.
En þrátt fyrir allt segist Massa ánægður með annað sætið eftir langa fjarveru frá keppni eftir höfuðmeiðslin sem hann hlaut í ungverska kappakstrinum í júlí í fyrra.
„Í fyrsta lagi finnst mér frábært að vera hér, þökk sé að allt sé frábært. Að vera hér með samkeppnisfæran bíl og fara í gegnum keppnina á góðum hraða alla tíð. Þökk sé drottni að ég er í lagi og þökk sé öllum sem hjálpuðu mér gegnum erfiða tíma.Kappaksturinn var frábær fyrir okkur. Vissulega tókst ræsingin ekki vel hjá mér, tapaði mikilvægri stöðu til Fernando í fyrstu beygju. En eftir það var kappaksturinn frábær bæði á mjúku dekkjunum og þeim hörðu,“ sagði Massa.
Hann dró Alonso uppi eftir að þeir komust fram úr Vettel en segir að þá hafi bólað á hitavanda í vélinni og bensíneyðslan jókst. Því hafi hann slakað á til að spara bensínið.„Það var ekkert meira að gera. Vandamál Vettels urðu okkur að láni, við það komumst við fram úr og unnum aukastig. Og það var líka lán að Lewis Hamilton var ekki hraðskreiðari í lokin,“ bætti Massa við.
