Schumacher kvaðst hafa skemmt sér vel í keppninni í Barein. reuters

Michael Schumacher segist hafa notið endurkomunnar í formúlu-1 í Barein en kvaðst óttast að herfræði vegna banns við bensínstoppum myndi ekki bjóða upp á tilþrifamikla keppni í ár.

Schumacher varð sjötti á mark í Barein, rúmum 40 sekúndum á eftir sigurvegaranum Fernando Alonso hjá Ferrari. Hann átti tiltölulega þægilegan dag en sagði kappaksturinn samt hafa verið „ágætis skemmtun“.

„Þetta snýst um ræsinguna og eftir það er bara að halda sínum hraða og gera ekki mistök. Framúrakstur er í grundvallar atriðum útilokaður, nema mönnum verði á akstursmistök. Það er það sem við okkur blasir við þær aðstæður sem herfræðing byggist á,“ sagði Schumacher við BBC-sjónvarpið í Barein.

„En hvað sem því líður þá var þetta ágætis skemmtun, sérstaklega framan af. Núna verðum við að vinna okkur upp á við til að draga þá uppi sem á undan eru,“ bætti Schumacher við.

Hann sagðist hafa átt í erfiðleikum með dekkin þegar langt var liðið á hvora aksturslotu. Það væri þó bara partur af því að aðlagast keppninni eftir þriggja ára fjarveru frá keppni.

Schumacher var sáttur við sjötta sæti. reuters

Schumacher í kappakstrinum í Barein. reuters