Massa í keppninni í Barein. reuters

Felipe Massa er á því að Ferrari muni ekki eiga jafn auðveldan dag í næsta kappakstri, í Melbourne í Ástralíu eftir hálfan mánuð, og í Barein í gær. 

Massa varð bæði annar í tímatökunum í Barein og í öðru sæti á endamarki. Liðsfélagi hans Fernando Alonso tók fram úr honum í ræsingunni og vann síðan kappaksturinn.

Massa keppti í Barein í fyrsta sinn eftir að hann hlaut alvarleg meiðsl í kappakstrinum í Búdapest í Ungverjalandi í fyrrasumar og var ánægður með útkomuna.

„Mig grunar að næsta keppni verði mun erfiðari og mjög jöfn. Við sáum í dag að líklega eru fleiri lið afar sterk. Red Bull er með öfluga bíla sem verða erfiðir viðureignar. Og McLaren gæti verið í slagnum og ef til vill Mercedes. Kannski gerast óvæntir hlutir. Við vitum alla vega að slagurinn verður erfiður.

Við þurfum að átta okkur vel á hvernig dekkin gagnast og finna út hvernig keppnisáætlunin geti orðið skilvirkust; hvar við getum grætt á henni og hvar hún gefur minna.

Aðstæður verða allt aðrar í næsta móti og því erfitt að átta sig á hvað þar gæti verið í vændum. Brautin er allt öðru vísi en hér,“ sagði Massa eftir kappaksturinn í Barein.

Massa á undan Rosberg í Barein. reuters

Massa var alla keppnina í humátt á eftir liðsfélaga sínum Alonso. reuters