Sauber mun breyta liðsheitinu
Engar auglýsingar er að finna á Sauberbílnum. reuters
Peter Sauber ætlar að fara fram á að fá nafni formúluliðsins breytt en þar er enn kennt að hluta til við fyrrverandi eigendur, BMW.
Þrátt fyrir að þýska bílafyrirtækið hafi ákveðið í fyrrasumar að draga sig út úr keppni í formúlu-1 ber liðið formlega enn heitið „BMW Sauber F1 Team“. Sauber keypti það af fyrirtækinu sem keypti liðið af honum 2004.
Sauber fór ekki fram á nafnbreytingu fyrir keppnistímabilið. Slíkar breytingar eru snúnar og gætu jafnvel leitt til þess að lið verði af tekjum vegna sjónvarpsútsendinga en því má liðið ekki við.
Peter Sauber hefur staðfest við breska akstursíþróttaritið Autosport að hann muni fara fram á nafnbreytingu. Einungis sé eftir að ákveða nákvæmlega hvenær farið verður fram á það, en af því verði einhvern tíma á keppnistímabilinu.Liðið er enn án aðalstyrktaraðila og segir Sauber að útilokað hafi reynst í janúar og febrúar að finna styrktaraðila í röðum stórfyrirtækja. Því væri hann í dag fyrst og fremst að reyna afla sér styrktarfyrirtækja fyrir næsta ár, 2011. Ef það gengi fljótlega gæti allt eins orðið, að liðið yrði kennt við hann þegar í ár.
