Webber á Red Bull í Barein. reuters

Mark Webber hjá Red Bull keppir á heimavelli, í Melbourne í Ástralíu, eftir rúma viku. Hann kveðst hlakka til enda fær hann nýjan bíl sem er með léttari undirvagn en bíllinn sem hann ók í Barein.

Strax eftir kappaksturinn í Barein tók Webber næstu flugvél heim til Ástralíu. Kappaksturinn í Melbourne um aðra helgi verður sá níundi á heimavelli frá því hann hóf keppni í formúlu-1.

„Ég var á spjalli við vélvirkjana mína í gærkvöldi og þeir segjast hafa spánýjan bíl handa mér fyrir Melbourne. Undirvagninn er meir að segja léttari, sem tryggir að við eigum að stíga skref fram á við í keppninni um toppinn,“ sagði Webber eftir heimkomuna.

Liðsfélagi hans hjá Red Bull, Sebastian Vettel, vann ráspólinn í Barein og var með forystu er kerti í vélinni bilaði með þeim afleiðingum að hann missti afl og mátti sjá þrjá keppinauta komast fram úr.

Webber gerir sig kláran til keppni í Barein. reuters