Johnnie Walker heldur de la Rosa gangandi
De la Rosa í bílskúr Sauber í Barein. reuters
Ökuþórinn Pedro de la Rosa hjá Sauber fær styrk úr óvenjulegri átt til að halda sér gangandi í formúlunni.
Hefur hann endurnýjað samning við fyrirtækið Diageo sem á skosku viskíframleiðsluna Johnnie Walker, eða Jón á röltinu eins og merkið er gjarnan nefnt manna á meðal.
De la Rosa samdi fyrst við fyrirtækið árið 2005 er hann var þriðji ökuþór McLaren. Hann auglýsir veigarnar en veigameira er þó hlutverk hans í kynningarherferð fyrirtækisins gegn því að menn aki undir áhrifum, eftir að hafa fengið sér einn.
Um er að ræða persónulegan samning og því munu tákn Johnnie Walker ekki birtast á auglýsingasnauðum keppnisbíl Pedro de la Rosa. Hann er sagður fá 300.000 evrur fyrir samninginn.
De la Rosa á ferð í Barein. reuters
