FIA lokar smugu í reglum
Loftdreifir stendur undan afturenda bílanna. reuter
McLaren, Mercedes og tvö önnur ótilgreind lið verða að breyta loftdreifurunum á neðanverðum afturenda keppnisbílanna fyrir ástralska kappaksturinn. Þar með er lokað á smugu í tæknireglum formúlunnar.
Í hönnunarforsendum er leyft að hafa holu í loftdreifinn fyrir sveif sem notuð er við gangsetningu bílanna. Mál hennar hefur hins vegar ekki verið afmarkað og það hafa lið nýtt sér til að búa hana þannig úr garði að ná fram meiri vængpressu.
Það gengur gegn tilgangi reglunnar og í raun hafa tilteknu liðin haft gatið miklu víðara en þörf er á fyrir mótorsveifina. Það var Brawnliðið sem þróaði þessa útfærslu þegar í fyrra og þótti sýnt, að með því að meitla hana til mátti auka vængpressu svo um munaði.
Bílar liða voru skoðaðir sérstaklega með sveifargatið í huga í Barein og í framhaldi af því hefur FIA tilkynnt fjórum liðum að þau verði að breyta dreifunum fyrir Melbourne.
Brawnliðið fann smuguna sem nú hefur verið lokað. reuters
