Barrichello nýtur sigurstundarinnar í Monza 2009. reuters

Ítalíukappaksturinn í formúlu-1 fer í næstu sex skipti fram í Monza. Eigendur brautarinnar hafa framlengt samning um mótshaldið út 2016.

Bernie Ecclestone hefur undanfarið talað um að Róm fái kappakstur á allra næstu árum. Þangað fer þó ekki Ítalíukappaksturinn, allavega ekki næstu sex mót, heldur verður hann áfram þreyttur í brautinni frægu.

Monza hefur verið vettvangur Ítalíukappakstursins í formúlu-1 allar götur frá árinu 1950 nema árið 1980, er hann fór fram í Imola. Kappakstur hefur farið fram í Monza mun lengur, eða frá árinu 1922. 

Samningurinn sem nú hefur verið framlengdur um mótshald í Monza átti að renna út á næsta ári, eftir kappaksturinn 2012.

Síðustu sex mót í Monza hafa jafn margir ökuþórar unnið. Í fyrra fór Rubens Barrichello hjá Brawn með sigur af hólmi. Var það þriðji sigur hans á ferlinum í Monza.

Rubens Barrichello í þjónustustoppi í Monza í fyrra. reuters