Webber segir Alonso hafa unnið sigur verðskuldað. reuters

Mark Webber er á því að Fernando Alonso hjá Ferrari hafi unnið þýska kappaksturinn í Hockenheim verðskuldað. Webber segir jafnframt, að það hafi verið hárrétt hjá Ferrari að beita liðsfyrirmælum - en þar er yfirmaður hans hjá Red Bull, Christian Horner, öndverðrar skoðunar.

Felipe Massa hafði forystu lengst af í Hockenheim en hægði síðan ferðina að fyrirmælum stjórnenda Ferrari svo Alonso gæti farið fram úr og sigrað. Webber segist ganga út frá því að stjórar Ferrari hefðu ekkert aðhafst ef Massa hefði getað ekið á brott frá Alonso. Raunin hafi verið sú, að Massa hafi í raun tafið Alonso.

„Þeir gáfu Felipe líka gott tækifæri til að vinna sigur. Þeir gerðu það allt þangað til hann gat ekki hrist Fernando af sér. Vitaskuld hefur það legið fyrir hjá liðinu að hraðskreiðasti náunginn í brautinni myndi vinna kappaksturinn.Og það var niðurstaðan, sá fljótasti vann,“ bætir Webber við.

Webber og Horner (t.v.) eru ósammála um liðsfyrirmæli. reuters