Hamilton skaust fram um nokkur sæti á síðustu sekúndu. reuters

Á síðustu sekúndum tímatökunnar í Spa krækti Lewis Hamilton hjá McLaren sér í annað sætið. Búast má við grimmum slag þeirra Mark Webber hjá Red Bull í upphafi kappakstursins en þeir eru í tveimur efstu sætum í keppninni um heimsmeistaratitil ökuþóra.

Silfurör McLaren er talin búa yfir betri beinlínuhraða en bíll Red Bull og vera sprækari á löngum hröðum köflum brautarinnar í Spa. Komist Hamilton í kjölsog Webbers á þeim er því allt eins spáð að hann nái að síga fram úr honum á fyrsta hring, einkum þó verði brautin þurr.

„Það er ágætt að vera á fremstu rásröðinni. Ég mun sækja hart en við verðum að sýna gætni samt. Við vitum ekki á þessu stigi hvort rignir eða hann hangi þurr. En staðan er ágæt,“ sagði Hamilton eftir tímatökurnar.

Hamilton í Spa í dag. reuters