Hamilton með allt í hendi sér
Hamilton fagnar sigri í Spa. reuters
Lewis Hamilton hjá McLaren náði forystu í ræsingu belgíska kappakstursins og lét hana aldrei af hendi. Hafði fullkomin tök á breytilegum aðstæðum og var sigri hans aldrei ógnað. Með honum tók hann aftur forystu í keppninni um heimsmeistaratitil ökumanna. Annar varð Mark Webber hjá Red Bull og þriðji Robert Kubica hjá Renault.
Hamilton hafði ástæðu til að fagna er hann ók fyrstur yfir marklínuna því hann hélt stöðu sinni þrátt fyrir tvær útkomur öryggisbíls í brautina og þrátt fyrir að lenda utan brautar og þurfa keyra rólega yfir malargryfju eftir að byrjaði að rigna í lokin. Sigurinn er sá þriðji vem hann vinnur á árinu.
Veðurfarið lék stórt hlutverk og breytilegar aðstæður af þeim völdum hleyptu mikilli spennu í keppnina. Stöðubarátta sem af því hlaust snerist þó meira um ökumenn í kringum miðjan hóp og aftar.Kubica var í öðru seinni á seinni helmingi kappakstursins en mistök í dekkjastoppi undir lokin urðu þess valdandi að Webber komst fram úr honum. Webber klúðraði ræsingunni og féll strax á fyrstu metrunum úr fyrsta sæti í það fimmta. Smám saman vann hann sig upp á ný og hlaut þriðja sætið í arf frá liðsfélaga sínum Sebastian Vettel.
Vettel í tómu tjóni
Vettel gerði sig sekan um akstursmistök á bremsusvæðinu inn að lokabeygjunni er hann hugðist taka fram úr Jenson Button hjá McLaren sem þá var annar. Tókst Vettel ekki betur til en svo að hann ók á Button svo hann féll úr leik vegna skemmda á McLarenbílnum.
Vettel skaust inn að bílskúr og fékk nýjan framvæng og dekk en var stuttu síðar látinn aka gegnum bílskúrareinina að nýju í refsingarskyni fyrir að hafa valdið árekstri að óþörfu.
Þetta reyndi á taugar Vettels sem sótti full djarft en það endaði með því að hann ók utan í annan bíl. Skemmdi hann og sprengdi dekk hjá sjálfum sér. Þurfti að aka heilan hring á þremur hjólum og féll um skeið niður í síðasta sæti.
Þrír titilkandidatar fengu ekki stig
Fyrir mótið var keppnin um heimsmeistaratitil ökuþóra mjög jöfn og tvísýn og fimm ökuþórar með góða möguleika. Það gjörbreyttist í dag því þrír þeirra fengu engin stig; Button, Vettel og Fernando Alonso hjá Ferrari sem féll úr leik vegna akstursmistaka.
Ók hann upp á glerhála beygjubrík á útleið úr beygju en þar var engin rásfesta svo bíllinn snarsnerist, lenti á vegg og laskaðist svo ekki var fram haldið þótt hann endaði aftur inni á braut. Alonso var á þessu stigi sjöundi og sex hringir eftir, en hann varð fyrir því við lok fyrsta hrings, að Rubens Barrichello hjá Williams ók aftan á hann svo Ferraribíllinn snarsnerist. Við það féll Alonso niður í síðasta sæti og Barrichello komst ekki hring í sínum 300. kappakstri.
Fyrir vikið hafa Hamilton og Webber hlotið sæmilegt forskot á þessa þrjá, en Hamilton hefur 182 stig, Webber 179, Vettel 151, Button 147 og Alonso 139 þegar sex mót eru eftir.Keppni bílsmiða jafnaðist og hefur Red Bull nú aðeins eins stigs forskot á McLaren, 330:329. Ferrari er með 248 stig og Renault sótti aðeins á Mercedes í keppninni um fjórða sætið. Hefur Mercedes 145 stig en Renault 121.
