Kubica sáttur við sinn hlut
Kubica fremstur í fylkingu í belgíska kappakstrinum í dag. reuters
Robert Kubica hjá Renault segist sáttur við þriðja sætið í belgíska kappakstrinum því hann hefði verið heppinn að ljúka keppni eftir atvik á öðrum hring er reynt hefði á taugar hans.
Kubica ók vel við misjafnar aðstæður og var í öðru sæti eftir fyrsta hring. Á næsta hring gerði hann mistök í Rauðvatnsbeygjunni svonefndu, brekkunni miklu snemma hringsins, sem reynst hefðu getað mun dýrkeyptari en að missa Jenson Button hjá McLaren fram úr sér þar.
„Ég sá Lewis [Hamilton hjá McLaren] taka Rauðvatnsbeygjuna vítt og ég var mjög vítt einnig en reyndi að skera hana við innri brún til að taka ekki hraða. En við það missti ég öll tök á bílnum, hann leitaði fyrst til vinstri og síðan til hægri. Ég var heppinn að ná aftur valdi á honum og geta haldið áfram.Þá hafði ég lélega rásfestu við endurræsinguna [eftir fyrri heimsókn öryggisbílsins], læsti hjólum fyrst að framan og svo að aftan,“ sagði Kubica.
Hann missti vegna þessa Sebastian Vettel fram úr sér á fjórða hring en fékk síðan annað sætið aftur við árekstur Buttons og Vettels. Glataði því í hendur Marks Webbers í dekkjastoppi er hann byrjaði að rigna í lokin.
Kubica veitir Hamilton keppni í Spa í dag. reuters
Kubica á Renaultinum á leið til þriðja sætis í Spa, á eftir kemur Massa hjá Ferrari. reuters
