Button með Vettel í skottinu rétt fyrir ákeyrslu þess síðarnefnda. reuters

Sebastian Vettel hjá Red Bull lýsti óskoraðri ábyrgð á hendur sér á árekstrinum við Jenson Button hjá McLaren undir lok 15. hrings belgíska kappakstursins. Við hann féll heimsmeistarinn Button úr leik.

Vettel freistaði framúraksturs við lokabeygju hringsins en missti vald á bílnum sem skrikaði til hliðanna og endaði á því að stingast inn í bíl Buttons.  Vettel gat haldið áfram keppni eftir að hafa fengið nýjan væng en tjón á silfurör McLaren kom í veg fyrir að Button héldi áfram keppni.

„Ég er leiður yfir þessu, það var auðvitað ekki ætlun mín að eyðileggja kappaksturinn fyrir honum né sjálfum mér. Ég var kominn nálægt honum og hraðskreiðari. Ég hélt að Robert [Kubica hjá Renault] gæti tekið okkur. Nokkrum sinnum komst ég nálægt Button en ekki nóg til að komast fram úr.

Ég reyndi að vinna hann utanvert á bremsusvæ´ðinu en missti vald á bílnum í bremsunni á ójöfnu í brautinni og eftir það hafði ég ekki vald á honum en því miður skall ég á Button,“ sagði Vettel eftir keppnina.

Honum var refsað með akstri gegnum bílskúrareinina en þangað varð hann að fara stuttu seinna með sprungið dekk eftir samstuð við Vitantonio Liuzzi hjá Force India. Vettel kórónaði svo frammistöðu sína með því að velja röng dekk undir bíl sinn fyrir rigninguna í lokin. Hafnaði hann í 15. sæti.