Lauda leiðréttir sig

Niki Lauda. reuters

Niki Lauda vill ekki kannast við gagnrýni sína á Ferrariliðið fyrir liðsfyrirmæli þess í þýska kappakstrinum. Við þeim brugðust fyrrverandi vinnuveitendur hans harkalega og sögðu hann hafa klúðrað gullnu tækifæri til að halda túlanum saman.

Haft var eftir Lauda á opinberri vefsíðu formúlu-1, að hann byggist við því að Ferrariliðið fengi hirtingu hjá íþróttaráði Alþjóða akstursíþróttasambandsins (FIA) fyrir að ögra dómgreind áhorfenda með því að gera Felipe Massa að gefa eftir forystu í kappakstrinum og hleypa Fernando Alonso fram úr sér í Hockenheim.

Ferrariliðið svaraði af hörku og minnti Lauda á að hann hefði sjálfur notið liðsskipana er hann ók fyrir liðið og ekki leiðst það. Nú neitar Lauda að hafa sagt það sem eftir honum var haft á formula1.com.

„Þessa hluti sagði ég aldrei,“ segir hann við ítalska íþróttadagblaðið Corriere della Sera í dag. „Ég sagði einungis í útsendingu að liðsfyrirmæli væru ekki góð fyrir formúlu-1 og skemmtigildið. Og að lið eins og Red Bull gerði rétt með því að leyfa Webber og Vettel að kljást að vild. Vinsamlega taktu fram að ég var aldrei í neinu viðtali.

Ég myndi leyfa liðsfyrirmæli, en aðeins eftir að annar ökuþóranna er úr leik í titilslagnum,“ segir Lauda. 

Ferrariliðið fagnaði þessum ummælum hans á heimasíðu sinni í dag gegnum dálkahöfundinn „hrossakvísl“. Sá skrifar: „Ég er ánægður með að Niki neitar því að hafa talað svona; það sýnir að það er gott að fylla lungun af fersku lofti.“