Button með Vettel í skottinu rétt fyrir ákeyrslu þess síðarnefnda. reuters

McLarenstjórinn Martin Whitmarsh gagnrýnir Sebastian Vettel hjá Red Bull harðlega fyrir ákeyrsluna sem felldi Jenson Button úr leik í belgíska kappakstrinum. Sagði hann aksturshætti hans ekki ekki í samræmi við kröfur sem gerðar eru til keppenda í formúlu-1.

Vettel missti vald á bíl sínum í keppni við Button um annað sætið í kappakstrinum. Misreiknaði hann bremsupunkt Buttons, snarsneri bíl sínum er hann reyndi að forðast silfurörina en sveigði aftur til baka og ók inn í hlið McLarenbílsins.

Vettel var refsað með akstri gegnum bílskúrareinina og Whitmarsh sagði framferði hans á brautinni ekki upp á marga fiska. „Þetta var eitthvað sem maður býst ekki við að sjá í formúlu-1 - minnir mann meira á lægri formúlurnar,“ sagði Whitmarsh strax eftir kappaksturinn. „Mér fannst gegnumakstursvíti tiltölulega væg refsing,“ bætti hann við.

Whitmarsh segist ekki skilja hvers vegna Vettel kom sér í þessa stöðu í rimmunni við Button sem átti í erfiðleikum vegna tjóns á framvæng. „Þetta voru undarleg mistök hjá honum verð ég að segja. Ég er klár á því að þetta var enginn ásetningur en furðulegt. 

Hafi hann ætlað sér farm að innanverður þá hafði hann ekki meira pláss en þrjár tommur svo guð einn veit hvað flaug í gegnum kollinn á honum. Þetta var svekkjandi, en svona er kappaksturinn, lífið heldur áfram.“

Whitmarsh var óhress með Vettel. reuters