Williams einbeitir sér að 2011
Barrichello fær alveg nýjan bíl á næsta ári. mbl.is/williamsf1
Williamsliðið einbeitir nú öllum kröftum hönnunar- og þróunarsviðs síns að keppnisbíl næsta árs. Lokið er gerð síðustu uppfærslu núverandi bíls og verða þær breytingar teknar í notkun í næstu mótum.
Williams fór laklega af stað á vertíðinni en hefur sótt verulega í sig veðrið. Og með nýjungum sem teknar verða í notkun í kappakstrinum í Singapúr, fimmta síðasta móti ársins, í septemberlok vonast liðið til að áfram verði slagkraftur í því.
Tæknistjórinn Sam Michael staðfestir að með lokafrágangi íhlutanna fyrir Singapúr sé þróunarvinnu við 2010-bílinn lokið og allur hönnunarkraftur settur í 2011-bílinn.Lítið verður sameiginlegt með hönnun bílanna í ár og þess næsta vegna reglubreytinga. Þannig hefur m.a. verið ákveðið að banna tvöfaldan loftdreifir og búnað til að rjúfa vængpressu afturvængs, svonefnda F-trekt. Þá koma dekk til sögunnar frá nýjum framleiðanda, Pirelli, sem verða frábrugðin núverandi dekkjum.
