Kobayashi með liðsstjóranum Peter Sauber eftir góðan dag.

Sauberliðið tilkynnti í morgun, að samningur við ökumanninn Kamui Kobayashi hafi verið framlengdur út næsta ár. „Við njótum nýliðans í liði okkar, bæði sem ökumanns og persónu,“ sagði liðsstjórinn Peter Sauber af þessu tilefni.

Kobayashi, sem er 24 ára, hefur vakið athygli með góðri frammistöðu og baráttuvilja. Og þrátt fyrir að eiga aðeins 15 mót að baki frá upphafi, þar af 13 í ár, hefur hann aflað liði sínu 21 stigs.

„Við höfum aldrei haft nokkrar efasemdir um hann fyrir næsta ár. Kamui hefur staðist allar okkar væntingar hvað hraða og baráttugleði varðar. Þá hefur samstarf hans og verkfræðinganna æxlast mjög vel og tæknilegur skilningur hans aukist mjög.

Sú reynsla sem hann hefur aflað sér á fyrstu fullu keppnistíðinni í formúlu-1 mun gagnast honum vel á næsta ári. Takmark okkar er að leggja honum til hraðskreiðan og endingartraustan bíl strax í byrjun næsta keppnistímabils,“ sagði Sauber.

Kobayashi þreytti frumraun sína í formúlu-1 með Toyotaliðinu í fyrra. Þar var hann reynsluökuþór en hljóp í skarðið sem myndaðist vegna meiðsla Timo Glock og keppti í tveimur síðustu mótum ársins, í Sao Paulo í Brasilíu og í Abu Dhabi. Í seinna mótinu lauk hann keppni í sjötta sæti.

Sauber sagði að beðið yrði með að tilkynna hver yrði liðsfélagi Kobayashi á næsta ári, en spænski ökuþórinn Pedro de la Rosa hefur verið liðsfélagi hans í ár.

Kobyashi í belgíska kappakstrinum í Spa. reuters