Liðum ekki fjölgað í 13
Nýja liðið hans Villeneuve fær ekki inn í formúlu-1. reuters
Keppnisliðum formúlu-1 verður ekki fjölgað á næsta ári og verða því 12 sem og í ár.
Alþjóða akstursíþróttasambandið (FIA) opnaði fyrir möguleika á nýju liði vegna brottfalls bandaríska liðsins USF1 sem komst aldrei á rásmarkið.
Fjöldi umsókna barst en íþróttaráð FIA mat það svo í dag, að engin umsókn uppfyllti þær kröfur sem gerðar hefðu verið til væntanlegs nýs liðs.
Meðal nýrra liða sem vildu komast til keppni í formúlu-1 var lið sem Jacques Villeneuve fyrrverandi heimsmeistari ökuþóra og ítalska GP2-keppnisliðið Durango stóðu að í sameiningu. Einnig spænska liðið Epsilon Euskadi sem fékk ekki náð fyrir augum FIA er það keppti um eitt sæti fjögurra nýrra liða í fyrra.
