Kamui Kobayashi hefur staðið sig vel.

Ökuþóraskipan hjá Sauberliðinu verður sú hin sama á næsta ári og á yfirstandandi vertíð. Samningar Kamui Kobayashi og Sergio Perez hafa verið framlengdir.

Ökuþórarnir hafa vakið athygli fyrir frammistöðu sína í ár og slík er ánægja með störf þeirra innan liðsins, að Sauber hefur ákveðið að halda í þá.

Liðsstjórinn Peter Sauber skýrði frá þessu í dag í aðdraganda ungverska kappakstursins sem fram fer um helgina. Ásamt þessu verður Esteban Gutierrez áfram varaökuþór Sauber.

Ferrari er eina liðið auk Sauber sem skýrt hefur frá ökuþóraskipan sinni á næsta ári, en þeir verða þeir sömu og í ár, Fernando Alonso og Felipe Massa. Sterklega er búist við því að hið sama verði ofan á hjá Red Bull, McLaren og Mercedes.

Sergio Perez verður áfram hjá Sauber. reuters